اسرائیل کے خلاف آواز اٹھانے پر امریکی ایوان نمائندگان میں فلسطینی قانون ساز کے خلاف قرار داد منظور.
امریکی ایوان نمائندگان میں اسرائیلی بربریت کا پردہ پوری دنیا کے سامنے بےنقاب کرنے والی واحد فلسطینی رہنما راشدہ طلیب کے خلاف مذمتی قرار داد منظور کر لی گئی.
راشدہ طلیب نے اسرائیل کے لئے امریکی حمایت اور غزہ پر اسرائیلی بمباری پر تنقید کی تھی.
غیر ملکی خبر ایجنسی کے مطابق راشدہ طلیب کے بیانات کے خلاف مذمتی قرارداد کے حق میں 234 ووٹ ڈالے گئے جبکہ 188 اراکین کی جانب سے قرار داد کی مخالفت کی گئی.
خبر ایجنسی کے مطابق 4 ری پبلکنز نے قرار داد کے خلاف ووٹ دیا جبکہ 3 ڈیموکریٹس اور ایک ری پبلکن رکن نے ووٹنگ میں حصہ ہی نہیں لیا.
راشدہ طلیب کا ایوان میں خطاب کرتے ہوئے کہنا تھاکہ میں کانگریس میں موجود واحد فلسطینی امریکی ہوں، میرے نقطہ نظر کی یہاں پہلے سے کہیں زیادہ ضرورت ہے، مجھے خاموش نہیں کروایا جا سکتا، میں کسی کو بھی اپنے الفاظ کو توڑ مروڑ کر پیش نہیں کرنے دوں گی.
یاد رہےکہ 7 اکتوبر سے غزہ میں جاری اسرائیلی بمباری میں اب تک 10 ہزار سے زائد مظلوم فلسطینی شہید ہو چکے ہیں، اقوام متحدہ اور ایمنسٹی انٹرنیشنل سمیت دیگر عالمی تنظیموں کے دباؤ کے باوجود اسرائیلی وزیراعظم بنیامین نیتن یاہو بمباری جاری رکھنے پر بضد ہے اور اس کا کہنا ہےکہ جنگ کے بعد غزہ پر غیرمعینہ مدت تک ہمارا قبضہ جاری رہے گا.
