بھارتی فضائیہ کا ایک اور مقامی سطح پر تیار کردہ تیجس لڑاکا طیارہ ایک تربیتی پرواز کے بعد لینڈنگ کے دوران حادثے کا شکار ہو گیا ہے۔
بھارتی حکام کے مطابق یہ واقعہ اس وقت پیش آیا جب طیارہ اپنی معمول کی مشق مکمل کر کے واپس اتر رہا تھا۔ حادثے کے وقت پائلٹ نے پیرا شوٹ کی مدد سے چھلانگ لگا کر اپنی جان بچا لی اور اسے کوئی شدید چوٹ نہیں آئی، تاہم جہاز کو پہنچنے والے بڑے نقصان کے باعث اسے ناقابل استعمال قرار دیے جانے کا امکان ہے۔
اس واقعے کے فوراً بعد بھارتی فضائیہ نے حادثے کی وجوہات جاننے کے لیے اعلیٰ سطح کی تحقیقات کا حکم دے دیا ہے۔ اس کے ساتھ ہی تمام تیجس طیاروں کی مکمل جانچ پڑتال کرنے کی ہدایت بھی جاری کی گئی ہے تاکہ یہ دیکھا جا سکے کہ کیا ان طیاروں کے نظام میں کوئی فنی خرابی تو موجود نہیں۔
یہ طیارہ ان 32 سنگل سیٹ طیاروں میں سے ایک تھا جو ہندوستان ایروناٹکس لمیٹڈ نے فضائیہ کے حوالے کیے تھے۔
